Şəhidlərimiz və qazilərimiz haqqında bugünədək
çoxsaylı məqalə yazmışam. Hər dəfə bu mövzunu işıqlandıranda düşünürəm ki,
torpaqlarımızı düşmən tapdağından azad edən bu fədai oğullar Azərbaycanın qalib
ölkə adlanmaq haqqını öz canları və qanları bahasına gerçəyə çevirdilər. Onlar
Vətən sevgisi, hərbçi ləyaqəti və mətinliyinin necə bir yenilməz güc mənbəyi
olduğunu döyüş sınağında isbat etdilər. O xalq ki, övladları şəhidlik və
qazilik məqamını müqəddəs bilərək uca tutur, onun qarşısında heç bir düşmən,
istənilən şər qüvvə dayana bilməz.

2020-ci
ilin sentyabr ayının 27-dən noyabr ayının 9-dək davam edən Vətən müharibəsində
Daxili İşlər Nazirliyi Daxili Qoşunlarının sıralarından yüzlərlə döyüşçü ön cəbhədən
qazi kimi qayıdıb. Belə döyüşçülərdən biri baş çavuş İlyasov Elmar Şıxlarbəy
oğludur. Elmarın yaşadığı mənzilə baş çəkdim, özü və ailə üzvləri ilə görüşdüm.

O,
15 iyul 1993-cü ildə Bakı şəhərində anadan olub. Onun böyüyərək boya-başa
çatdığı ailə hərbçilər ailəsidir. Atası Şıxlarbəy İlyasov Sovet ordusu və Azərbaycan
ordusu sıralarında “gizir” hərbi rütbəsində xidmət edərək ehtiyata buraxılıb.
Birinci Qarabağ müharibəsinin iştirakçısıdır. Həmin müharibədə Elmarın dayısı
İmran Kəlbiyev erməni işğalçılarına qarşı pulemyotçu olaraq cəsarətlə vuruşub.
Elmardan yaşca kiçik olan qardaşı Ramazan İlyasov 2016-cı ilin aprel döyüşlərində
iştirak edib, hazırda Azərbaycan Respublikası Hərbi Dəniz Qüvvələrinin müddətdən
artıq həqiqi hərbi xidmət  hərbi
qulluqçusudur.

Onu
da qeyd edim ki, Elmarın babası Şeydabəy İlyasov II Dünya müharibəsi dövründə hərbi
zavodda işləyərək ön cəbhənin sursatla təmin olunmasına öz fədakar əməyi ilə
töhfələr verib. Qazinin babasının qardaşı isə II Dünya müharibəsində hərbi təyyarəçi
kimi faşistlərə qarşı vuruşaraq həlak olub.

Ailənin
ikinci övladı olan Elmar paytaxtın Sabunçu rayonunun Bakıxanov qəsəbəsindəki
271 saylı tam orta məktəbdə 4-cü sinfədək oxuyub. Olimpiya İdman Liseyində orta
təhsilini davam etdirib.

Kiçik
yaşlarından cüdo idman növü ilə məşğul olmağa başlayıb. Valideynləri onun
idmana maraq göstərməsini həmişə dəstəkləyiblər. Məktəblər arasında
spartakiadalarda, eləcə də lisey birinciliyində o, uğurlu nəticələri ilə fərqlənib.
Ümumilikdə, müxtəlif növ yarışlarda qalib yerləri tutaraq müvafiq dərəcəli
diplom və medallarla təftif edilib. İdmanla davamlı şəkildə məşğul olması onun
xaraktercə mübariz gənc kimi formalaşmasında ciddi rol oynayıb. Məktəbli olarkən
idmanla yanaşı, hərbi hazırlıq, ədəbiyyat və tarix fənləri üzrə dərslərdə daha
fəal olub. Orta təhsil aldıqdan sonra Azərbaycan Dövlət Bədən Tərbiyəsi və
İdman Akademiyasına qəbul olunmağa səy göstərsə də, bu baş tutmayıb.

2011-ci
ilin oktyabr ayında Elmar müddətli həqiqi hərbi xidmətə çağırılıb. Daxili
Qoşunların Bakı şəhərinin Nərimanov rayonunda yerləşən “N” saylı hərbi hissəsində
ilkin təlim dövrünü keçərək hərbi and içib. Sonra qoşunların Zaqatala
rayonundakı “N” saylı hərbi hissəsində xüsusi təyinatlı dəstənin xüsusi həmlə
qrupunda snayper vəzifəsində xidmət edib. Əsgər olaraq hərbi xidmət borcunu
vicdanla yerinə yetirərək müddətdən artıq həqiqi hərbi xidmətdə qalmağa qərar
verib. Beləliklə, atasının yolunu davam etdirməyi, həyatını hərbi xidmətə
bağlamağı özü üçün başlıca məqsəd kimi qətiləşdirib.

2013-cü
ilin aprel ayının 16-dan etibarən Elmar qoşunların qeyd edilən hərbi hissəsində
müddətdən artıq həqiqi hərbi xidmətə keçirilib. Bu hərbi hissədə xüsusi təyinatlı
dəstənin xüsusi həmlə qrupunun yarımqrupunda qumbaraatan köməkçisi, xüsusi həmlə
qrupunda atıcı-radiotelefonçu vəzifələrində xidmət edib. 2015-ci ilin oktyabr
ayının 7-də isə Hacıqabul rayonunda yerləşən “N” saylı hərbi hissədə xüsusi təyinatlı
dəstənin xüsusi həmlə qrupunda yarımqrup komandiri vəzifəsinə irəli çəkilib.
Xidmət etdiyi vəzifələrdə komandanlığın etimadını doğruldub, nümunəvi hərbi
qulluqçu kimi dəfələrlə mükafatlandırılıb.

Təlimlərdə
həmişə çalışqanlıq göstərərək öz döyüş hazırlığının yüksəldilməsini, bilik və
bacarıqlarının təkmilləşdirilməsini qarşısına məqsəd qoyub. Özünün dediyinə görə,
xüsusi təyinatlı məsləyinə sadiq qalaraq, daim döyüş tapşırıqlarının yerinə
yetirilməsinə mənəvi-psixoloji cəhətdən hazır olmağı vacib bilib. Yarımqrup
komandiri kimi də tabeliyindəki hərbi qulluqçulara xüsusi təyinatlıya xas
keyfiyyətlərin aşılanmasını diqqətdə saxlayıb.

Elmar
xüsusi təyinatlı üçün şərəfli olan zoğalı beret daşıma hüququnu da qazanıb.
Bunun naminə göstərdiyi məharət və çəkdiyi zəhmət təqdirəlayiqdir.

2017-ci
ilin fevral-may aylarında Elmar Türkiyə Respublikasına ezam edilərək Jandarm
Baş Komandanlığının Foça Jandarm Komando Məktəbləri və Təlim Mərkəzi
Komandanlığında komando təməl kursunu müvəffəqiyyətlə bitirib. Həmçinin, Foça
Dalğıc Mərkəzində Türkiyə Sualtı İdman Federasiyasının təşkil etdiyi təlim
proqramı üzrə aidiyyəti kurs keçib.

Hərbi
xidmət dövründə Elmar ictimai təhlükəsizliyin təmin olunması, silahlı cinayətkarların
axtarılması, narkotiklərlə mübarizə yönündə xüsusi əməliyyatlarda iştirak edib.
Xüsusi əməliyyatlar zamanı bir neçə dəfə təhlükəli vəziyyətlə üzləşib, özünü
itirmədən qarşıya qoyulan tapşırıqları qətiyyətlə yerinə yetirib.

44
günlük Vətən müharibəsi silahdaşları ilə birgə Elmarın da hərbçi həyatının ən çətin
və şərəfli sınağı oldu. Həmin vaxt xidmət etdiyi “N” saylı hərbi hissənin
xüsusi təyinatlı dəstəsinin şəxsi heyətinin tərkibində ön cəbhəyə göndərilib.
Öncə qoşunların Bərdə rayonundakı “N” saylı hərbi hissəsində yerləşdiriliblər.
Burada xüsusi təyinatlıların tapşırıqları dəqiqləşdirilib, ayrı-ayrı qruplar
yaradılıb. Ötən ilin oktyabr ayının əvvəlində “N” saylı hərbi hissədən Füzuli
rayonu ərazisinə gəliblər, Qaraxanbəyli kəndi yaxınlığındakı mövqelərin müdafiəsində
dayanıblar. Elmarın komandir təyin olunduğu qrupun ilk tapşırıqları müdafiə
mövqelərinin möhkəmləndirilməsi, düşmənin bu istiqamətdə mümkün hücumunun
qarşısının alınması olub. Bir neçə gün sonra Cəbrayıl rayonu ərazisinin dərinliyinə
doğru hərəkət ediblər. İşğaldan azad edilən Cəbrayıl rayon mərkəzi və ətraf ərazilərin
müdafiəsi, işğalçıların diversiya-kəşfiyyat qruplarının bu zonaya daxil
olmasının qarşısının alınması, nəzarətə götürülən hərbi nöqteyi-nəzərdən vacib
obyektlərin mühafizəsi tapşırıqlarını yerinə yetiriblər. Sonra yenidən Füzuli
rayonu istiqamətində hərəkət ediblər və nəhayət, Xocavənd rayonunun Hadrut qəsəbəsində
xüsusi təyinatlılardan ibarət qruplar cəmləşdiriliblər. Qrupların yenidən
komplektləşdirilməsi və tərkibinin dəyişdirilməsi həyata keçirilib. Onun
komandiri olduğu qrup mayor Elman İslamovun tabeliyinə verilib. Lazımi hazırlıq
görüldükdən sonra xüsusi təyinatlılardan ibarət qruplar Şuşa istiqamətində hərəkətə
başlayıblar. Xocavənd rayonunun mürəkkəb relyefə malik ərazisi ilə, qrunt
yollarla hərbi avtomobil karvanı yola düşüb. Müəyyən edilmiş əraziyədək
karvanın hərəkəti zamanı bir neçə dəfə düşmən artilleriyasının atəşinə məruz
qalıblar. Həmin anlarda döyüşçülər avtomobillərdən düşərək mövqeləniblər. Ancaq
karvanın hərəkəti zamanı canlı qüvvə sarıdan itkilərimiz olub. Elmarın
yaxınlığında olan müddətdən artıq həqiqi hərbi xidmət hərbi qulluqçusu əsgər Nəzir
Osmanov ağır yaralanaraq şəhid olub.

Beləliklə,
2020-ci il noyabrın 1-də Elmar ondan bir neçə metr məsafədə partlayan minaatan
mərmisinin qəlpələrindən sol qolundan yaralanıb. Döyüşçü yoldaşları, müddətdən
artıq həqiqi hərbi xidmət hərbi qulluqçuları baş çavuş Orxan Əhmədov və əsgər
Qüdrət Kəlbiyev ona ilk yardım göstəriblər. Hərbi qospitala təxliyyə edilib.
Aldığı yaralardan və sol qolunun bir neçə saat jqutla bağlanmış vəziyyətdə
qalmasından bu nahiyənin amputasiya təhlükəsi olub. Xoşbəxtlikdən həkimlər
bunun qarşısını alıblar. O, bir neçə rayonun xəstəxanası, Daxili Qoşunların Hərbi
Qospitalı və Azərbaycan Tibb Universitetinin Tədris Cərrahiyyə Klinikasında
müalicə olunub.

Qazi
yaralanmadan sonra sol qolunun bərpa olunmasında Azərbaycan Tibb
Universitetinin Tədris Cərrahiyyə Klinikasının cərrahı Nicat Səttarovun əməyini
xüsusi vurğuladı. Onun müalicəsində zəhməti olan Daxili Qoşunların Hərbi
Qospitalının cərrahiyyə şöbəsində həkim-cərrah Sevda Mustafayevaya, “Vivasan”
klinikasının həkimləri Gülüstan Gözəlova və Kəmalə Əliyevaya minnətdarlığını
bildirdi. Hazırda onun sol qolunda yaralanmanın fəsadları qalmaqdadır, bu səbəbdən
hərbi xidmətə yararlı deyil. Artıq hərbi xidmətdən tərxis olunub.

“N”
saylı hərbi hissədə xüsusi təyinatlı dəstə komandirinin müavini-qərargah rəisi,
Vətən müharibəsi iştirakçısı mayor Elman İslamov baş çavuş E.İlyasovu hərbi
xidmət dövründə və müharibə zamanı peşəkar xüsusi təyinatlı, cəsur döyüşçü kimi
xarakterizə etdi.

Azərbaycan
Respublikası Prezidentinin imzaladığı 29.12.2020-ci il tarixli müvafiq sərəncamlarla
baş çavuş E.İlyasov “Şuşanın azad olunmasına görə” və “Kəlbəcərin azad
olunmasına görə” medalları ilə təltif edilib.

2019-cu
ilin oktyabr ayının 3-də Elmar ailə qurub. Müharibədən ailəsinə sağ qayıtması
doğmaları üçün böyük xoşbəxtlikdir. Anası Kəmalə İlyasova Elmarla qürur
duyduğunu söylədi, bütün qazilərin hörmət və ehtirama layiq olduqlarını dedi.

Qazilik
fədakarlıq və el-obanın gözündə mənəvi ucalıq deməkdir. Məqalədə haqqında söhbət
açdığım döyüşçünün timsalında da bu həqiqət bir daha öz təsdiqini tapır.

                                                                                                  alçın Abbasov,

DİN-in
Daxili Qoşunlarının veteranı, tədqiqatçı-jurnalist